ඇමෙරිකානු ජනාධිපති ඩොනල්ඩ් ට්‍රම්ප් කළ කතාවක් සංස්කරණය කර පැනරාමා වාර්තා වැඩසටහනක භාවිත කළ ආකාරය පිළිබඳව විවේචන එල්ල වීමෙන් පසුව, ඩොනල්ඩ් ට්‍රම්ප් බීබීසීයට එරෙහිව නීතිමය ක්‍රියාමාර්ග ගන්නා බවට අනතුරු අඟවා තිබේ.

ඔහුගේ නීතිඥ කණ්ඩායම බීබීසී ආයතනයට නොවැම්බර් 14 වන දින දක්වා එම වාර්තා වැඩසටහන “සම්පූර්ණ හා සාධාරණ ලෙස ඉල්ලා අස්කර ගැනීම” සඳහා අවසාන දිනයක් ලබා දී ඇත – එසේ නොමැති වුවහොත් ඩොලර් බිලියන 1ක (£760m) වන්දියක් සඳහා නඩු පවරනු ඇත.

බීබීසී අභ්‍යන්තර ලේඛනයක සඳහන් වූයේ, 2021 ජනවාරි 6 වන දින ට්‍රම්ප් කළ කතාවක කොටස් දෙකක් එකට සම්බන්ධ කිරීමෙන් මෙම වැඩසටහන නරඹන්නන් නොමග යවා ඇති බවත්, එමගින් ඔහු මැතිවරණ පරාජයෙන් පසු එක්සත් ජනපද කැපිටල් ගොඩනැගිල්ලට පහර දෙන ලෙස ජනතාවගෙන් පැහැදිලිව ම ඉල්ලා සිටින බවක් පෙනෙන්නට ඇති බවත් ය.

බීබීසී ප්‍රවෘත්ති ප්‍රධාන විධායක නිලධාරී ඩෙබෝරා ටර්නස්, අධ්‍යක්ෂ ජනරාල් ටිම් ඩේවි සමග ඉල්ලා අස්වීමෙන් පසු, සංස්ථාව “ආයතනික වශයෙන් පක්ෂග්‍රාහී” නොවන බව අවධාරණය කළා ය.

බීබීසී පුවත් සේවයේ සංස්කරණ ප්‍රමිති කමිටුවේ හිටපු ස්වාධීන බාහිර උපදේශකයෙකු වන මයිකල් ප්‍රෙස්කොට් විසින් ලියන ලද සංදේශයක් පසුගිය සතියේ ටෙලිග්‍රාෆ් විසින් ප්‍රකාශයට පත් කරනු ලැබූ පසු එල්ල වූ පීඩනය ඉහළ යාම හේතුවෙන් ඉරිදා ඔවුන්ගේ ඉල්ලා අස්වීම් සිදුවිය.

ගාසා වාර්තාකරණය, ට්‍රම්ප් විරෝධී සහ ඊශ්‍රායල විරෝධී පක්ෂග්‍රාහීත්වය සහ ඒකපාර්ශ්වික සංක්‍රාන්ති ලිංගික වාර්තාකරණය ඇතුළු අනෙකුත් “ගැටලු” සම්බන්ධයෙන් අදාළ ලේඛනය මගින් චෝදනා කර තිබේ. එය පැනරාමා වැඩසටහනේ ට්‍රම්ප්ගේ කතාවේ සංස්කරණය පිළිබඳව ද සඳහන් කර තිබිණි.

සඳුදා දිනයේදී බීබීසී සභාපති සමීර් ෂා, වාර්තා වැඩසටහන සම්බන්ධයෙන් “විනිශ්චයේ දෝෂයක්” සිදු කර ඇති බවත්, සංස්කරණය කරන ලද කතාව “ක්‍රියාත්මක වීම සඳහා ඍජු කැඳවීමක්” ලෙස හැඟීමක් ඇති කළ බවත් පිළිගත් අතර, බීබීසී ඒ සඳහා සමාව අයැදීමට කැමති බව පැවසීය.

එහෙත්, බ්‍රිතාන්‍ය පාර්ලිමේන්තුවේ සංස්කෘතික, මාධ්‍ය සහ ක්‍රීඩා කමිටුවේ ලිපියකට ප්‍රතිචාර දක්වමින් ඔහු පැවසුවේ, අදාළ ලේඛනය නිසා බීබීසී “වළලා දැමීමට උත්සහ කළ” කරුණු අනාවරණය වී ඇති බව “සරලව ම සත්‍ය නොවේ” – එමෙන් ම ලේඛනයේ මතු වූ ගැටලු විසඳීමට බීබීසී කිසිවක් කර නොමැති බව පැවසීම නිවැරදි නොවන බව ය.